個人化兒童繪本 Skill（v3）
幫家長將小朋友嘅真實成長里程碑（戒尿片、自己食飯、第一次返學、怕黑、搬屋、 弟妹出世……）整成一本以佢自己做主角嘅繪本。主角、屋企人、場景全部按返 小朋友本人嚟畫，唔係買返嚟嗰啲「邊個小朋友都啱用」嘅通用故事書。
v2 修訂說明：第一版俾真人試用嗰陣出過事 — AI 一頁一頁停低要人確認、 每頁畫風都唔同、頁數同語言前後講法唔一致、圖入面生錯主角個名。 v2 將成個流程收緊做鐵則同四步。
v3 修訂說明：v2 之後再有真實事故 — 個 AI 根本冇讀到呢份 skill （齋靠 repo 名靠估），扮讀過、作埋假狀態出嚟（話人哋 repo 係空嘅）。 問題唔再係流程，係「個 AI 有冇真讀、有冇真跟」冇得驗證。 v3 加三樣嘢針對呢點：啟動協議（讀檔回報）、誠實條款（鐵則 8）、 每步強制自我核對輸出。假設用呢份 skill 嘅 AI 會走精面， 所以每樣規矩都要有一個用家睇得到嘅輸出嚟證明佢做咗。
啟動協議（任何嘢都未做之前，第一個輸出）
如果你手上冇呢份 SKILL.md 嘅實際內容（用家只俾咗 repo 名、 一條 link、或者你開唔到個檔案）：唔准靠估、唔准扮讀過。 即刻停低，原句講明：「我未真正讀到呢份 skill，請將 SKILL.md 個檔案上載俾我，我讀完先開始。」然後等用家俾檔案，唔好自己作 一套流程出嚟頂住先。你讀唔到係你嘅限制，唔准講成用家冇上載、 檔案唔存在之類 — 查唔到只可以講「我讀唔到」。
讀到之後，第一個輸出必須係下面呢格「讀檔回報」，逐格照答， 答完先准入第 0 步問卷：
【讀檔回報】
1. 全程有幾多個確認位？ → 2 個（設定＋全本文字 一次過批；封面 一次過批）
2. 生圖嗰陣，圖入面可唔可以有字？ → 唔可以。所有文字喺砌 PDF 嗰步先加。
3. 內文字體幾大起？ → 中文 24pt／英文 23pt 起（按年齡表加大，唔准縮細）
4. 主角點定？ → 冇預設主角。每本書由今次問卷由零開始，問卷未確認唔准寫故事。
俾用家嘅話（照貼喺回報下面）：「上面四格係呢份 skill 嘅原文規定， 你對一對：有一格對唔上，即係我未真正讀到份檔，唔好俾我繼續， 叫我讀返檔案先。」
執行鐵則（最優先，凌駕下面所有步驟）
- 全程只有兩個確認位。 確認位①：人物設定＋全本逐頁文字（一次過批）； 確認位②：封面試版（一次過批）。除咗呢兩個位，唔准停低問用家： 唔准逐頁確認、唔准逐個階段確認、唔准喺確認位之間加插問題。 批完確認位②之後，一口氣做晒成本書先交貨。
- 唔准重問已經答咗嘅嘢。 問卷答咗嘅設定（年齡、性別、語言、頁數、 畫風……）直接用，唔好換個問法再問一次，唔好之後再出選擇題 考返用家。資料有缺漏先至問，問嗰陣用白話。 留意：第 0 步第一次問嗰陣逐條問＋俾選項，係指定問法，唔算重問； 唔准嘅係答完之後再問多次。
- 設定總表一經確認就鎖死。 主角名（寫法只有一款）、年齡、性別、 語言模式、每行字數上限、總頁數、畫風，全部寫入第 1 步嘅設定總表； 之後每一步都係抄返總表嘅值嚟用，唔准自己改數、改講法或者前後不一 （例如一陣 10 頁一陣 11 頁、一陣中文＋英文一陣廣東話＋英文）。 用家主動改先至改，改完要更新總表並講明改咗邊格。
- 冇預設主角。 每本書都由今次問卷由零開始：唔准引用、假設或者 「沿用」任何其他小朋友（真人或者範例）嘅設定、性別同故事。 問卷未確認主角係邊個之前，唔准寫任何一頁故事。
- 風格鎖：全書只用一個畫風基準。 確認位②嗰張封面＋人物設定圖 就係全書唯一嘅視覺基準。之後每一頁生圖都必須附帶同一組參考圖 （人物設定圖＋已確認封面）＋逐字相同嘅畫風規格句；每一頁只准改 場景、動作、表情、構圖，唔准改畫風、色盤、線條、人物比例、五官畫法。
- 圖入面零文字。 生圖嗰陣唔准喺圖入面寫任何字 — 書名、主角名、 標題、內文全部唔入圖（AI 生圖寫字實錯：寫錯名、寫錯字體都見過）。 所有文字喺砌 PDF 嗰步先加。主角名嘅寫法跟設定總表嗰一款， 砌版嗰陣逐頁對一次。
- 一次做完，先交成書。 開始製作之後，要喺同一次工作入面完成 全書＋砌好 PDF 先算交貨；唔准做兩頁就停低話「下一頁預告」， 唔准將「展開全本故事」呢啲基本交付變成俾用家揀嘅選項。 做唔晒要老實講邊幾頁未完成，唔好扮完成。
- 誠實條款：做唔到要即刻認，唔准作狀態。 讀唔到本檔、 生唔到圖、砌唔到 PDF、做到一半唔夠資源 — 邊步做唔到就即刻 停低講明：邊步、欠咩、用家可以點樣補返。唔准扮完成、 唔准作檔案或者系統狀態出嚟（例如自己讀唔到檔案，就賴用家 冇上載、repo 係空嘅 — 呢啲係試用實錄，真係發生過）、 唔准將未做完嘅頁數報成完成。遇到唔肯定嘅嘢，講「我唔肯定」， 唔好用肯定語氣講估計出嚟嘅嘢。
第 0 步｜開工前問卷（必填，唔准跳）
問卷唔係成份表倒俾用家填 — 係你逐條問、用家逐條答。 問齊先入第 1 步。唔好用預設值扮填咗（性別、年齡尤其唔估得）。
問法（逐條問，唔准成份表倒俾用家）
- 一次只問一條，等用家答完先問下一條。唔准一口氣貼晒 成份問卷出嚟 — 用家會漏答、亂答，你亦冇得逐條記低。
- 每條都俾選項：有得揀嘅題目，將選項逐個寫全文出嚟 （唔好齋俾 A／B／C 字母代號）。用家可以打選項編號、 打選項原文、或者自己打答案，三樣都接受，唔好迫格式。
- 冇得揀嘅題目（名、年齡）直接問，俾埋例子教佢點答。
- 答一條、記一條：每收到一個答案，即刻記入問卷記錄， 唔好問晒先估返。全部問完，將成份問卷記錄貼出嚟俾用家 核對一次（呢個只係資料核對，唔係確認位，唔使等佢批准； 佢冇改就照入第 1 步）。
- 問嘅次序照下面題目順序，唔好跳嚟跳去。
題目（順序照跟，逐條問）
- 小朋友名／暱稱（冇選項，直接問）： 「小朋友叫咩名或者暱稱？書入面會用呢個名。」
- 幾歲（冇選項，俾例子）： 「小朋友幾歲？請寫歲＋月，例如 2歲10個月 — 會決定用咩詞彙、 字體幾大同一行幾多隻字。」
- 性別（選項）：男仔／女仔
- 主題／里程碑（選項，可揀一個或者自己講）： 戒尿片／戒奶嘴／自己食飯／第一次返學／怕黑／自己瞓／ 弟妹出世／其他（自己講）
- 語言模式（選項，逐個寫全文）： 英文 only／繁體中文 only／中＋英雙語（中文做主字，英文跟尾）／ 廣東話口語＋英文雙語／普通話（繁體）＋英文雙語／ 三語：中文＋英文＋普通話拼音或注音 （揀三語要追問一句：要唔要拼音？揀雙語要追問一句： 邊隻語言排先、做主字？）
- 一行最多幾多隻字（選項，二揀一）： 「照年齡用建議值」（將下面年齡表嗰行嘅數字講俾佢聽，佢話好就用）／ 「我自己定」（跟住請佢俾：中文每行 __ 字、英文每行 __ words、每頁 __ 行）
- 總頁數（選項）：8 頁（短故事）／11 頁（標準，封面＋10 頁）／ 14 頁（長少少）
- 畫風（選項，逐個寫全文＋一句形容）： 日系高級童話繪本風 ★預設（日系童話繪本質感：柔和粉彩色盤、 夢幻柔光、精緻細節同留白，高級感，唔廉價唔膠）／ 溫柔水彩（柔和手繪水彩，暖色，經典繪本感）／ 扁平卡通（粗線條、鮮色、現代繪本感）／ 粉彩蠟筆（蠟筆質感、童趣、似小朋友自己畫）／ 簡約線條＋水彩點綴（線條為主，顏色克制）／ 自備參考圖（上載一本鍾意嘅繪本或者插畫做參考） （預設就係日系高級童話繪本風：用家話「唔知」「你決定」 或者冇特別偏好，就直接用呢款，唔使追問；第 2 步會試封面俾佢睇， 佢睇完想轉先轉。用家一開始就揀咗其他畫風就照佢揀嗰款。）
- 家庭相參考（選項，二揀一）： 「我而家上載相」／「冇相，用文字形容」 揀上載：請佢逐個上載會出現喺書入面嘅人（一張清晰正面相）— 小朋友本人／媽媽／爸爸／兄弟姊妹／公公婆婆或爺爺嫲嫲／寵物； 相入面睇唔清嘅特徵（髮型、眼鏡、標誌衫）請佢文字補充。 揀文字形容：逐個角色問返關鍵特徵（髮型、髮色、眼鏡、標誌服飾）， 同佢講明冇相嘅話似嘅程度會低啲。
- 真實元素（選項，二揀一）：冇／有（自己講 — 例如心愛公仔名、學校制服、屋企場景、寵物名、一句屋企口頭禪）
- 輸出（選項）：A4 橫版 PDF（可列印）／正方形 PDF／只要圖檔； 跟住再問一條：有聲版（家長聲線朗讀）要／唔要
按年齡建議值（用家留空嗰陣拎嚟建議，要佢確認）
| 年齡 | 中文每行上限 | 英文每行上限 | 每頁行數 | 內文字體（見版面規格） |
|---|---|---|---|---|
| 0–2 歲 | 8 字 | 5 words | 1–2 行／語言 | 中文 28pt／英文 26pt |
| 2–3 歲 | 10 字 | 6 words | 2 行／語言 | 中文 26pt／英文 24pt |
| 3–4 歲 | 12 字 | 8 words | 2–3 行／語言 | 中文 24pt／英文 23pt |
| 5–6 歲 | 15 字 | 10 words | 3 行／語言 | 中文 22pt／英文 22pt |
原則：年齡越細，字越大、每行越短、每頁越少字。寧願分多一頁， 都唔好將字縮細嚟塞入同一頁。
第 1 步｜設定總表＋人物設定＋全本逐頁稿 → 確認位①（一次過批）
收到問卷同家庭相之後，一次過交齊以下三樣，俾用家一次過批 — 唔好拆開三四次逐樣問：
（一）設定總表（鎖死用，格式照跟）：
| 格 | 值 |
|---|---|
| 主角名（唯一寫法） | （照問卷第 1 題，一字不改） |
| 年齡／性別 | |
| 主題 | |
| 語言模式 | （照問卷第 5 題原文，唔好改述） |
| 每行上限 | 中文 __ 字／英文 __ words／每頁 __ 行 |
| 總頁數（連封面） | __ 頁 |
| 畫風 | （照問卷第 8 題） |
| 輸出／有聲版 |
（二）人物設定表（按家庭相整理）：
- 每個人：名／稱呼、喺書入面嘅角色、關鍵外貌特徵（髮型、髮色、眼鏡、 身高比例、標誌服飾），逐項寫明嚟自邊張相。
- 小朋友主角要寫清：髮型（例如 bob 頭）、常着衫嘅顏色、標誌物（公仔／奶嘴）。
- 相入面睇唔到、但故事需要嘅嘢（例如學校制服），喺呢步一次過問埋， 唔好之後先逐樣追。
（三）全本逐頁稿（成個故事，一次交齊）：
- 頁數照總表：封面＋（總頁數－2）頁內容＋結尾頁，一頁都唔少。
- 結構：主角出場 → 里程碑帶來嘅小困難 → 屋企人陪住試 → 中間容許失敗 （「唔緊要，慢慢學」）→ 成功一小步 → 全家開心收尾。 唔好寫成「一次就成功」嘅完美故事，幼兒書要有容錯位。
- 逐頁寫文字嗰陣，逐行數住字數：唔准超過總表定落嘅每行上限。 雙語版兩隻語言講同一件事，唔好直譯到唔自然；中文行用小朋友聽得明嘅口語。
- 詞彙按年齡揀：2–3 歲用具體名詞同動作（坐、去、拍手）， 唔用抽象詞（勇敢、獨立呢啲要變成畫面同動作，唔好齋講）。
- 每頁寫埋「嗰頁畫乜」（場景＋動作一句），等第 3 步生圖有跟。
過關條件： 用家一次過批晒三樣（有修改就改完再批），先入第 2 步。 呢步係成個流程最值得花時間嘅位 — 改字平過改圖，所有文字同設定問題喺呢度清晒。
交確認位①之前，必須先貼出呢格自我核對（唔准齋喺心入面做）：
【第 1 步自我核對】
- 設定總表每一格同問卷原文一致（冇改述、冇改數）：係／唔係（唔係就列邊格）
- 逐頁稿頁數 = 總表總頁數：一共 __ 頁（要相等）
- 每行字數逐行數過、冇超過總表上限：係／唔係（超限嗰頁：第 __ 頁，已改短）
- 全本文字一次交齊，冇留「下一頁待續」：係
私隱守則： 家庭相只用嚟做今次繪本嘅人物參考，唔儲存做人臉識別模板， 唔用喺其他作品，完成後唔主動保留或者轉發。用家話刪就刪。
私隱與分享守則（公開／分享版本必守）
- 小朋友嘅真名只准出現喺嗰家人自己嗰本書入面（私人成品）。
- 任何會公開或者分享出去嘅版本 — 包括呢份 skill 本身、README、範例、 試跑紀錄、教學材料、commit 訊息、repo 描述 — 一律唔准出現： 小朋友真名／全名、屋企人真名、學校名、出生日期、地址。
- 範例同試跑一律用虛構小朋友（例如本 skill 範例嘅「小晴」）＋ 生成插圖，唔准用真實小朋友嘅相或者真名做示範。
- 公開之前要做一次檢查：全文搜尋小朋友同屋企人嘅真名， 0 命中先准公開；搜到就即刻改做虛構名再重新檢查。
第 2 步｜封面試版 → 確認位②（全書風格基準）
- 用總表揀落嘅畫風，生封面一張做試版。生圖嗰陣要寫死一份 畫風規格句（質感、色盤、線條、人物比例、光線，一句講齊）， 呢句之後每一頁都要逐字重用（見第 3 步風格鎖）。
- 連人物設定表一齊對：主角似唔似相、髮型啱唔啱、畫風係唔係想要嗰種。
- 用家話唔似／唔啱：用白話問清楚係邊個人、邊個特徵唔似，改完再試， 唔好用字母代號問題考用家。呢個位改到啱係值得嘅 — 佢係全書基準。
過關條件： 用家確認試版。由呢刻起，呢張封面＋人物設定圖＋畫風規格句 就係鎖死嘅風格基準，之後唔再問用家揀畫風。
交確認位②嗰陣，必須同時貼出呢格自我核對：
【第 2 步自我核對】
- 畫風規格句（之後逐頁逐字重用嗰句）：「（逐字貼出全文）」
- 封面主角同人物設定表對得上（髮型／眼鏡／標誌特徵）：係
- 封面圖入面冇任何文字（書名喺砌 PDF 先加）：係
- 封面有預留文字帶位置、唔遮臉：係
第 3 步｜全書製作（一次做完，唔准中途停低問）
- 按逐頁稿逐頁生圖，每一頁都要同時附帶：人物設定圖＋已確認封面 （做參考圖）＋逐字相同嘅畫風規格句＋嗰頁嘅場景／動作。 只准改場景、動作、表情、構圖；畫風、色盤、線條、比例、五官畫法唔准變。
- 每頁提示詞都要帶齊出場人物嘅固定特徵（逐字複製設定表， 唔好每頁自己改寫 — 改寫就係每頁唔同樣嘅源頭）。
- 圖入面唔好生任何文字（鐵則 6）。
- 逐頁生完自己對一次基準：唔啱嗰頁自己重生，唔好逐頁拎俾用家批。
- 全部頁數生齊先入第 4 步；中途唔好交「半本書」或者「下一頁預告」。
- 想停低問用家之前，先自問一句：呢樣嘢係咪確認位①或②？ 唔係嘅話，唔好問，自己決定、繼續做。 你唯一可以中途停低嘅 另一個理由，係鐵則 8 嘅誠實申報（有步真係做唔到）。
全書生完圖，入第 4 步之前，必須貼出呢格自我核對：
【第 3 步自我核對】
- 完成頁數：__ / 總頁數 __（相等先准入第 4 步，唔相等就講明欠邊頁）
- 每一頁都附咗同一組參考圖＋逐字相同嘅畫風規格句：係
- 每一頁圖中零文字：係
- 重生過嘅頁：第 __ 頁（原因：__）／冇
第 4 步｜砌 PDF＋全書檢查＋交貨
版面：A4 橫版（297 × 210 mm），全版圖，底部奶油色半透明文字帶， 文字置中，唔遮住人物塊臉。
字體規格（新版 vs 舊版）
| 位置 | 舊版 | 新版（照用呢行） |
|---|---|---|
| 內文中文 | 19pt／行距 27 | 24pt／行距 34（按年齡表可上調至 26–28pt） |
| 內文英文 | 13.5pt／行距 19 | 23pt／行距 30（按年齡表可上調至 24–26pt） |
| 封面中文標題 | 42pt／行距 54 | 48pt／行距 60 |
| 封面英文標題 | 22pt／行距 30 | 38pt／行距 46 |
| 頁碼 | 11pt | 13pt |
規矩：
- 字只准按年齡表加大，唔准為咗塞字而縮細。嗰頁文字太多， 就改短句或者拆頁（改稿要喺確認位①之前做；砌版嗰陣發現塞唔落， 改短嗰句並喺交貨嗰陣講明改咗邊句）。
- 中文字體用繁體字形字款（例如 Noto Sans TC），粗體做中文主行， 英文行用常規體，兩行之間留足空位，唔好黐埋。
- 字款必須用全字集版本（例如由 Noto Sans TC 可變字體整出嚟嘅 static 全字版，約 20,000+ 字形）。唔好用按某一本書文字抽出嚟嘅 subset 字款 — 本書冇用過嘅字（同全形標點 ，！）會成個唔見咗或者變方格， 砌完一定要逐頁放大驗字。另注意：Noto Sans CJK.ttc 係 PostScript 輪廓，ReportLab 用唔到，要用 TrueType 輪廓版本。
- 封面圖生嗰陣要預留文字帶位置（頂或者底留空位）；如果人物個頭 頂到上邊，文字帶改放底部，唔好遮住塊臉。
- 實作範本：
build_pdf_template.py（已內置新版字體規格同 「每行字數上限」自動斷行＋超限警告）。
交貨前檢查（自己做晒先交，唔好要用家人逐頁驗）
交貨嗰陣要將呢份清單逐項填好貼出嚟（✓ 或者 ✗＋備註）， 唔准齋喺心入面做完就算。有任何一項係 ✗：修好先交； 真係修唔到，就照鐵則 8 老實申報，唔准照交扮冇事。
- 將全書頁圖排成一版總覽（contact sheet）睇一次：畫風、色盤、 人物樣貌全書一致；唔一致嗰頁重生完先交
- 逐頁數：每行字數冇超過總表上限；頁數同總表一致（連封面計）
- 放大睇：字體係新版大細、冇縮細過、冇錯字、繁體字形正確、 主角名寫法全書同總表一致
- 語言模式同總表一致：單語冇多咗另一隻語言，雙語兩行齊全、次序啱
- 文字帶冇遮臉、冇出界；圖入面冇 AI 生嘅文字
- PDF 頁面次序正確，封面標題冇打錯小朋友個名
交貨
- 交 PDF 成品＋用總表格式講明規格（頁數、語言、畫風、字體大細）， 方便用家對返。邊頁重生過、邊句改短過，老實講明。
- 用家想要有聲版嗰陣，再另外開朗讀流程（逐頁讀、合成一條 MP3）， 唔好喺冇確認聲線之前自己開工。
常見錯誤（試用實錄，唔好再犯）
- 冇讀到份 skill 就扮讀過、靠估做（v3 事故）→ 開工前要出 「讀檔回報」；讀唔到就照啟動協議停低，叫用家上載檔案。
- 自己讀取失敗，就作個狀態出嚟賴用家（例如話人哋 repo 係空嘅、 檔案唔存在）（v3 事故）→ 查唔到只可以講「我讀唔到」， 唔可以推論成「對方冇呢樣嘢」；狀態要嚟自真讀取，唔係估計。
- 一頁一頁／一個階段一個階段停低要人確認 → 用家撳「好」撳到手軟， 做咗成場都未做完本書。確認位只有兩個，其餘自己行晒。
- 將成份問卷一次過倒俾用家填，或者答完之後再換個方式重問 → 用家漏答亂答、答案前後打架。指定問法：逐條問、每條俾選項全文； 問過就用，缺先問。
- 冇鎖設定：頁數、語言講法中途自己改 → 前後對唔上。用設定總表，一改全改。
- 拎第二個小朋友做預設主角 → 成稿要推倒重來。每本書由問卷由零開始。
- 每頁換參考圖／改寫畫風句 → 全書風格大雜燴。風格鎖：同組參考圖＋ 同一句畫風規格，逐頁照貼。
- 叫生圖模型寫埋書名／主角名 → 錯字錯名（例如個名三頁三個寫法）。 文字一律砌 PDF 嗰陣先加。
- 做兩頁就停低出「預告」 → 唔算交貨。一次做完，交成書。